Во Србија вчера пристигна група патници кои се вратија од Дубаи по низа одложувања на летот, а кои патувале со редовна авионска линија, а не преку владина евакуација. Околу 200 патници, кои претходно купиле билети за „Flydubai“, беа известени од авиокомпанијата дека нивниот лет кон Белград конечно ќе се реализира.
Првиот обид летот да полета беше во саботата, токму на денот кога започнаа воените судири меѓу САД, Израел и Иран, но летот беше одложен дури три пати. По дополнителни безбедносни проверки од страна на „Emirates“ и локалните власти, конечно беше донесена одлука летот да се изврши синоќа.
Истовремено, од аеродромот во Дубаи полетаа и авиони кон Варшава, Ријад, Адис Абеба, Мумбаи, Рига, Лахоре, Прага, Будимпешта, Милано, Коломбо и Баку, додека вчера беа одложени вкупно 65 редовни летови. Летот кон Белград, изведен со „Боинг 737 Макс 8“, беше проследен во живо од околу 40.000 луѓе преку специјализирани интернет-страници. Авионот слета утринава во 06:17 часот.
