Зеленски нареди итно склучување договори за дронови: Украина се подготвува за нова етапа на офанзива
Претседателот на Украина, Володимир Зеленски, му нареди на новиот министер за одбрана, Денис Шмигаљ, веднаш да ги финализира сите договори за набавка на дронови неопходни за украинските одбранбени сили. Посебен акцент е ставен на набавката на дронови-пресретнувачи.
„Во тек е ревизија на сите договори што бараат итно затворање. Наложив веднаш да се потпишат сите релевантни договори поврзани со дроновите“, соопшти Зеленски преку „Телеграм“, пренесува агенцијата „Укринформ“.
Тој додаде дека со министерот разговарале и за зголемување на далекусежните напади врз руска територија, како и за зголемена прецизност на украинските удари. Шмигаљ во следните недели ќе презентира нов работен план со клучни приоритети, што треба да се реализираат и на краток и на среден рок.
Зеленски информираше и дека по извештајот на врховниот командант на украинската армија, генерал Александар Сирски, е одлучено да се обезбедат дополнителни ресурси за нанесување долгорочни и прецизни удари врз руските сили.
Ситуацијата на фронтот останува тешка, особено во областите Суми, Харков, како и во регионот на Донецк, каде што руските сили се обидуваат со интензивни напади и диверзантски акции да пробијат украински одбранбени линии. Зеленски увери дека украинските сили успешно ги неутрализираат овие обиди и нема да дозволат навлегување во градовите и селата.
Шмигаљ, кој до неодамна беше премиер, на 17 јули официјално е назначен за министер за одбрана на Украина.
