Во најновата тужба, Трамп бара оштета од 10 милијарди долари

Трамп поднесе тужба од 10 милијарди долари против „Волстрит џурнал“ и Руперт Мардок поради наводна клевета

Американскиот претседател Доналд Трамп поднесе тужба вредна 10 милијарди долари против компанијата „Дау Џонс“, издавачот на весникот „Волстрит џурнал“, и нејзиниот сопственик Руперт Мардок, обвинувајќи ги за клевета и нарушување на законите за медиумско известување.

Повод за тужбата е напис во кој се тврди дека Трамп во 2003 година му испратил „непристојна“ роденденска порака на финансискиот инвеститор Џефри Епстин, години пред Епстин да биде обвинет за сексуални злосторства. Трамп категорично ја отфрла автентичноста на пораката и тврди дека станува збор за „целосна измислица“.

„Поднесовме силна тужба против сите вклучени во ширењето на оваа лажна, злонамерна и клеветничка сторија, објавена во бескорисниот медиум каков што е ‘Волстрит џурнал’“, напиша Трамп на социјалните мрежи.

Тој додаде дека и весникот и Мардок биле однапред предупредени за можни правни последици доколку ја објават содржината.

Од „Дау Џонс“ возвратија дека стојат зад своето известување. „Имаме целосна доверба во точноста и професионалноста на нашиот извештај и ќе се браниме енергично од сите обвинувања“, соопшти портпаролот на компанијата.