Украинскиот претседател Володимир Зеленски денеска изјави дека украинските сили на фронтот во моментов најмногу внимание посветуваат на Покровскиот правец и Запорошката област, каде руската армија го зголемила бројот и обемот на јуришни напади.
„На фронтот: најмногу внимание сега е на Покровскиот правец и во Запорошката област, каде Русите ги зголемуваат бројот и обемот на нападите. Ситуацијата таму е тешка, особено поради временските услови кои им одговараат на напаѓачите. Но ние продолжуваме да го уништуваме окупаторот. Им благодарам на секоја наша единица, на секој војник што е вклучен во заштитата на украинските положби“, напиша Зеленски на Телеграм откако го сослушал извештајот на врховниот командант на Оружените сили на Украина, Александар Сирски.
Според неговите зборови, ситуацијата во Купјанск е „малку полесна“.
„Нашите војници постигнуваат резултати, и тоа е тренд веќе неколку недели“, додал украинскиот претседател.
Тој истакнал дека со Сирски разговарал и за подготовка на длабоки удари — конкретни правци и очекувани резултати.
