Русија во текот на целата ноќ жестоко го напаѓаше Киев со хиперсонични ракети и дронови, во еден од најинтензивните удари врз украинската престолнина оваа година. Најмалку едно лице загина, а уште 15 се повредени – меѓу кои и едно дете – соопштија локалните власти.
Нападот започнал нешто по 1 часот по полноќ, кога во небото над градот биле забележани првите прелети на дронови и силни експлозии. Ударите продолжувале во бранови со часови, за наутро, околу 7 часот, Русија да испука нова серија проектили, меѓу кои и хиперсоничните „Кинжал“ ракети – една од најмоќните во арсеналот на Москва.
Тешки разурнувања на повеќе локации
Штета е регистрирана во најмалку шест делови на градот: Свјатошински, Дњипровски, Дарницки, Шевченковски и Соломенски реон. Во неколку висококатници целосно се уништени горните катови, а други објекти се оштетени на пониските нивоа. Избувнале најмалку шест пожари, и пожарникарите со часови работеле на нивно локализирање.
Спасувачки акции и жртви
Спасувачките тимови ја минале целата ноќ пребарувајќи ги урнатините. Телото на загинат маж било пронајдено под рушевините во Свјатошинскиот дел на градот, потврди шефот на регионалната воена управа, Тимур Ткаченко. Градоначалникот Виталиј Кличко информираше дека осуммина повредени се хоспитализирани, меѓу нив и дете од Шевченковски реон.
Големи прекини во струја и вода
По утринскиот бран напади, западниот дел на Киев останал без електрична енергија. Екипите за итни интервенции работат на стабилизирање на мрежата. На десниот брег на Дњепар е забележан и намален притисок на водоснабдувањето.
Нападите ја погодиле и околината на Киев
Во поширокиот регион се повредени најмалку две лица. Во Бровари е оштетена деветкатница, а гувернерот Микола Калишник пријави уништени семејни куќи и околу дваесет гаражи.
Русија редовно изведува масовни ракетни и дрон-напади врз украинските градови, често таргетирајќи цивилна инфраструктура. Само пред неколку дена, во сличен напад врз Киев загинаа седум, а беа повредени околу 20 лица.
