Во Хонгконг е прогласена тридневна жалост, почнувајќи од денес, поради смртоносниот пожар што зафати повеќе станбени згради во комплексот Ванг Фук Корт во Таи По, каде животот го загубија 128 лица, пренесува „South China Morning Post“.
Во пожарот се повредени 79 лица, меѓу кои 12 пожарникари, а сè уште се трага по околу 200 жители.
Осумте станбени блокови зафатени од пожарот биле во процес на реновирање од јули 2024 година. Зградите биле обвиткани со бамбусови скелиња и зелени заштитни мрежи.
Градските власти соопштија дека лесно запалливиот стиропор користен при работите довел до многу брзо ширење на огнот.
Во тек е кривична истрага за утврдување на причините за пожарот. Досега се уапсени 11 лица – осум од страна на единицата за борба против корупција (ICAC), а три лица се уапсени од полицијата под сомнение за убиство од небрежност.
