Поради два дрона кои ноќеска илегално прелетаа над северна Молдавија, привремено беше затворен целиот воздушен простор на земјата. Просторот повторно беше отворен во 1:27 часот по полноќ, освен над северниот регион, соопштија властите.
Според властите, двата дрона, кои не биле забележани на радар, прелетале над Молдавија кон регионот на левиот брег на Дњестар, пренесува молдавскиот портал „Њузмејкер“.
Украинските гранични служби ја известиле молдавската гранична полиција за дроновите кои ја преминале државната граница.
Областа каде се пријавени прелетите се проверува, но до сега не се идентификувани објекти кои би претставувале ризик по безбедноста на граѓаните, соопштија властите.
