Затворска казна за менаџерката која организирала проституција во Скопје: Еве колку наплаќале за еден час, а колку за цела ноќ

Основниот кривичен суд – Скопје денеска изрече пресуда за тројца од вкупно четворицата обвинети во случајот со посредување на девојки од Бразил за проституција во Скопје. На првообвинетата, Де Јесус Невес Марлиене, државјанка на Бразил, ѝ е изречена казна затвор од пет години и шест месеци. Третообвинетиот Сабедин Демири и четвртоосомничениот Немања Михајловски, државјани на Македонија, добија алтернативна пресуда – условна казна од една година, односно една година и шест месеци, со рок на тестирање од три години во кој случај ќе мора да одлежат затвор. Судот денеска го одвои постапувањето за второобвинетиот Маан Махмалад, исто така државјанин на Македонија, бидејќи тој беше единствениот кој не призна вина.

Јавната обвинителка Сузана Мирчевска – Крстевска образложи дека тројцата обвинети се прогласени за виновни за делата посредување при вршење на проституција и перење пари, додека четвртоосомничениот Михајловски е виновен само за перење пари.

Обвинителката појасни дека во периодот од декември 2023 до декември 2024 година, првообвинетата Де Јесус Невес Марлиене и второобвинетиот Маан Махмалад, со умисла и од користољубие, организирале и го контролирале сместувањето и секојдневниот живот на пет бразилски државјанки на возраст од 26 до 38 години, кои се занимавале со проституција во Скопје. Девојките биле сместени во два стана во комплексот „Џевахир Холдинг“ и давале услуги на клиенти кои ги контактирале преку меѓународна веб-страница за ескорт услуги низ Европа.

Првообвинетата ги управувала профилите на девојките на веб-страницата, одговарала на клиентите, организирала распоред за нивните услуги и одредувала цени што се движеле од 150 евра за половина час до 800 евра за цела ноќ. За секоја заработка, таа добивала 30 проценти провизија.

Третообвинетиот Сабедин Демири, кој работел како таксист, бил во контакт со девојките, ги превезувал и им помагал при сместувањето. Исто така, тој вршел перење пари преку трансфери на средства по налог на девојките, вклучително и испраќање пари во Португалија за да се прикрие потеклото на парите.

Четвртообвинетиот Немања Михајловски бил вклучен во конверзија на паричните средства во криптовалути, вршел трансакции и дури отворал крипто-паричник за една од бразилските девојки. Тој бил свесен дека со овие постапки врши перење пари, знаејќи дека изворот на средствата е од казниво дело.

Судската одлука денеска ја потврди сериозноста на случајот и укажа на активностите поврзани со организирано посредување во проституција и прикривање на заработката преку нелегални трансакции.