Стравични детали за безбедносните пропусти во кочанскиот клуб „Пулс“ откри денешното рочиште преку исказот на инспекторот од Дирекцијата за заштита и спасување (ДЗС). Увидната екипа по пожарот затекнала состојба која не остава простор за евакуација: помошната врата била заклучена со катанец и без квака, а дополнително запечатена со стиропор од надворешната страна.
„Најболната работа беше заклучената задна врата. Немаше систем за јавување пожар, хидрантот беше празен – без вода, без црево и без млазници“, истакна сведокот. Според него, објектот бил „стапица“ со лесно запаливи материјали, каде дури и прозорците на тоалетите биле со железни решетки, оневозможувајќи каков било излез или пристап на брзата помош.
