Територијата на Македонија денес, недела 24 мај 2026 година, ќе биде под влијание на циклонска активност со центар југоисточно од земјава, како и под влијание на влажна и нестабилна воздушна маса, што ќе донесе изразено нестабилни временски услови низ повеќе делови од државата.
Според најавите, времето ќе биде променливо облачно и нестабилно, проследено со повремени врнежи од дожд, грмежи и засилен ветер од северен и североисточен правец.
Метеоролозите предупредуваат дека на одредени места атмосферските процеси ќе бидат значително поинтензивни и ќе преминат во локално невреме. Очекувањата се за обилен пороен дожд, чести електрични празнења, силен ветер со брзина од 50 до 60 километри на час, како и услови за појава на град.
Поради можноста за вакви поинтензивни временски процеси, се апелира граѓаните да бидат внимателни, особено при движење на отворен простор, во планински региони и во подрачја каде може да дојде до нагло зголемување на водостоите и појава на локални проблеми.
Нестабилно време се очекува и во Скопје и околината, каде во текот на денот ќе има променлива облачност со повремени врнежи од дожд и грмежи, проследени со засилен ветер од северен и североисточен правец.
Во делови од Скопската котлина постојат услови и за развој на локално невреме со пообилни врнежи, електрични празнења, силни налети на ветер од 50 до 60 километри на час и можност за појава на град.
Максималните дневни температури низ Македонија денес ќе се движат од 21 до 28 степени, додека во Скопје температурата ќе достигне околу 25 степени Целзиусови.
Надлежните препорачуваат внимателност во сообраќајот и следење на најновите временски информации во текот на денот.
