Австралиецот Дејвид Хоул направил неочекувано откритие додека истражувал во Регионалниот парк Мериборо близу Мелбурн, вооружен со детектор за метал. Во жолта глина забележал необично тежок, црвеникав камен и веднаш помислил дека во него се крие злато – сосема логично, бидејќи подрачјето е познато по златната треска од 19 век, пренесува Science Alert.
Убеден дека ќе открие богатство, Хоул го однел каменот дома и се обидел да го отвори со пила, аголна брусилка, дупчалка, па дури и со киселина. Но, каменот не се предавал – ниту дури и при силни удари со чекан. Причината? Воопшто не бил обичен камен.
Станувало збор за редок метеорит.
„Имаше издлабена, ребраста структура“, изјавил геологот Дермот Хенри од Музејот во Мелбурн за The Sydney Morning Herald. „Тоа се создава кога метеоритите минуваат низ атмосферата – надворешниот слој се топи, а воздухот го моделира обликот.“
Откако сите негови обиди пропаднале, Хоул го однел мистериозниот предмет во Музејот во Мелбурн, каде што експертите потврдиле дека станува збор за вистински и редок метеорит, многу повреден од парче злато.
