Лукоил ја прифати понудата: Гунвор ќе ги купи странските средства на рускиот гигант
Под силен притисок од американските санкции, рускиот енергетски гигант Лукоил објави дека ја прифатил понудата од компанијата Гунвор за купување на Lukoil International GmbH – фирмата што ги управува сите странски средства на групацијата.
Само неколку дена претходно, Лукоил најави дека ќе се повлече од своите меѓународни операции, откако САД воведоа нов пакет санкции поврзани со руската инвазија врз Украина.
Продажбата претставува најголема корпоративна трансакција досега на една руска компанија како директен одговор на западните санкции од почетокот на војната во февруари 2022 година.
„Клучните услови на договорот веќе се утврдени, а Лукоил ја прифати понудата, обврзувајќи се да не води разговори со други потенцијални купувачи,“ соопшти компанијата. Од своја страна, Гунвор потврди дека се во активни преговори за преземање на странските средства на Лукоил.
